sametoyou

Fritz Fenzl

Da Zoaga ruckt auf Zwäife
(Bairische Gedichte)


Weitamacha

Nua so weita,
woana, lacha,
traurig, heita,
schlaffa, wacha,
nua zua, nua zua,
weitamacha.

Klopfs an da Dia,
dann is a Ruah
mit soiche Sacha.

Oiso nach:
Weitamacha,
so lang ois wia.





Allerheiligen

Aufgwacht
Boid Liacht ogmacht -
Da Dog vagähd
Und scho weads spät

Rumganga
Wenig ogfanga -
A Woch vagähd
Und scho wads spät

An Schnee wads gehm
No gschpüa i s`Leem -
A Monat gähd
Und scho weads spät

Ewige Ruah
Da Schnee deckts zua -
A Jahr - es gähd
Und scho weads spät

A Liachtl brennt
Staad, ohne End -
As Leem vagähd
Und scho weads spät

Jetzt foid da ei
Oiss gähd voabei -
Do denkst an Eahm:
Ans Sterm




Ea

Ea denkt nach
üwa sei Sach,
schnauft
und sauft.

Hoib zwäif schlogts scho,
doch hockta no,
denkt nach, wos waar...
saufts Glasl laar,

hockt in da Kamma,
denkt dumpf und schwaar,
denkt nach, wos waar...
Und sauft se zamma.







A Dog

Aufwacha
Wos schaffa
Nacha
Weitaschlaffa







Hoamgeh und dobleim

"I moan, i gäh...!"
" - Wohi?"
"Hoam hoid!"
" - Ah gääh!"
"Bleibst du no do...?"
"...I scho!"
"Awa..."

"Wos awa?"
"I moan hoid..."
" - Wos moanst?"
"Moanadst...?"
" - Ha?!"
"Obsd moanadst?"
"I moanad scho!"
" - Awa nachad weads zschbäd...!"
"Weads scho ned wean!"
" - Wanns no ned schlafft...?"
" - Ha?"
"Wanns no wach ist...?"
"Wead scho ned sei!"
"Awa wanns...?!"
"Gäääh!"
" - Awa!"
" - Bleibst hoid no so lang do!"
"Du bist scho guad!"
" - Wos?"
"Mia bressiads hoid!"
" - Bressiads da?"
"Ja bisdn du dorad?"
" - Ha?"
" - jetzt waar i scho dahoam!"
"Waarst hoid ganga!"
"jetzt is scho wuascht!"
" - Ehm!"
" - Na beiwi glei do!"
" - Ehm!"
"...Is ma äh liawa!"
" - Ehm! - "








So wos!

Sog!
Sogs!
Sog hoid!

Sog wos,
sog mas,
sog scho!

Sunst sog ist,
i sog das!

Oda redst heit ned?
Sog?






Moanst?


Moanst?
Moanst wiakle?
Oda maoanst bloss dassd moanst?

I maoanad nämle
Dass du erast dann was moanst
Wenn i moan
Dass du wos zum moana host

Moanst ned aa?






A Dog

Aufwacha
Wos schaffa
Nacha
Weitaschlaffa





Da Ausgleich

Die Madl, auf die i scharf waar,
dene konn i am Huat naufsting.

Die Madl, die auf mi scharf sam,
die kenn mia am Huat naufsteign.

So bin i eingle
in Punkto "Partnerbeziehungen"
a recht ausgeglichna Mensch.









Sei duads wos

(Eine Tragödie in 4 Akten)

Prolog: "Wos huifts aa scho? -"
1. Akt: "Ehm!"
Mahnlied des Chors: " - Meiliawa!"
2. Akt: " - Auwäh!"
chor: "Denkt hammas uns!"
3. Akt: "Au wäh! Au wäh!"
Klagelied des Chors: "Omeiomeiomeiomeiomei...!"
4. Akt: "Sei duads wos! - "
Schlusslied des Chors: " - Ja, mei!"





Gor nix

A oide Frau mit ara Katz
Koa Mo
Koane Kinda
Nix

Katz gstorm

A oide Frau
Koa Mo
Koane Kinda
Koa Katz
Nix

Gor nix.



-------------------



Ea

Ea denkt nach
üwa sei Sach,
schnauft
und sauft.

Hoib zwäif schlogts scho,
doch hockta no,
denkt nach, wos waar...
saufts Glasl laar,

hockt in da Kamma,
denkt dumpf und schwaar,
denkt nach, was waar...
und sauft se zamma.



-----------



Auferstehung des Fleisches

Stöi da voa,
am Jüngstn Dog
wias do olle
im Himmi drom
daherakumma wean:

Gstumpfade,
Aufgschossne,
Krummhjaxade,
Nosade,
Boanige,
Doagade,
Plattade,
Hoorige,
Bauchade,
Bucklade,
Gropfade,
Gschiaglade...

Stengans beinand,
olle mitanand,
vor da Pfortn,
mog si da Petrus
woi denga:
A Auferstehung
des Geistes
häds gwieß
aa scho do!



------------



Des oide Liad vom Kuglschreiwa

Wos schreim miassn
An Stift suacha
D´Schlamparei biaßn
Umanandafluacha

Endlich a Schreibg´grät!
Oida Kuglschreiwa
Nua oans is saubläd
Ea gähd ned. Leida

Draufdrucka om drom
Huift nix, is umasunst
d´Mina is krummbong
Varruckt wean kunnst

Awa dann umdran
Und in Disch einirenna
do gähds dann scho zamm
Ma muaß´ nua kenna

Dann Schreim ofanga
Awa mei
Da Saft ausganga
Vorm Explodian sei

Aufm Bladl wuid rumfahrn
Huift oft ned schlecht
A so a Schmarrn
Jetzt batzta recht

die Tintn kimmt nimma
Oda gibt lauta Fleck
Awa die Finga
san scho volla Dreck

Des Gschbui ändat nia si
So gähds oiwei weida
As oide Liad sing i
Vom Kuglschreiwa

Des Singa beglückt
Gar manche Stund
Wenns wos zum Schreim gibt
Mit dem mistign Glump



---------------



Aufananda eigspuit
"Woaßt, wo?"
"Ja, wo scho!"
"-Wo...?"
"Woaßt scho!"
"- Aso!"



-----------


Wos da Pfarra sogt

Des ko
scho so sei,
des ko
a ned so sei,
wea woaß.

Wissn
duad ma ned,
obs so is,
awa
ma woaß a ned,
obs andas is.

Weil...
Wea sois a scho wissn?

Nua:

Wenns ned a so is,
dann woaß ma äh ned,
wos ma doa soid.

Awa:

Wenns nachad
doch so waar,
wias da Pfarra sogt,
(ma woaß ja nia),
dann san
mia
auf jedn Foi
am Sonndag
oiwei
in Kiacha ganga!




-----------



Faust I

Faust: "I siech nix!"
Mephisto: "Weast scho seng!"
Der Herr: "Weast di scho no oschaung!"
Mephisto: "Schaug!"
Faust: "I siech imma no nix..."
Der Herr: "Do siegstas!"
Faust: "I konns nimma oschaung!"
Mephisto
(zum Herrn): "Host jetzt des gseng!?"
Der Herr
(zu Mephisto: "Gäh, do schaugst...!"


--------------


Gedankn an a Zukunft mit dia

Heiratn,
di heiratn,
a Wohnung mitanand,
a Leem mitanand,
Kinda,
Enklkinda,
dazu du,
nua du,
oiwei nua du,
a Leem lang nua di ham,
a ganz Leem lang nua di ham deaffa, -
a ganz Leem lang oiwei nua di ham miassn...


...